දෙවැනි අදියරේ නිවාස වලිනුත් සියයට 25 ක් වෙන්කර ගනී
කොළඹ හැව්ලොක් පාරේ පිහිටි සුපිරි හැව්ලොක් සිටි නිවාස සංකීර්ණයේ පළමු අදියරේ නිවාස වලින් තවත් විකිණීමට ඇත්තේ නිවාස දහයක් පමණක් බවත් ආරම්භ කිරීමට නියමිත දෙවැනි අදියරේ නිවාස වලින් සියයට 25 ක් දැනටමත් වෙන්කර ගෙන ඇති බවත් අනාවරණය වේ.
ඉදිකර තිබෙන කළුණු දෙකේ නිවාස 226 ක් තිබෙන අතර දෙවන අදියර ලෙසින් මේ වසරේ ඔක්තෝම්බර් මාසයේදී තවත් කුළුණු දෙකක් ඉදිකිරීමට සැලසුම් කර තිබෙන අතර එය නිවාස 225 කින් සමන්විත වේ.
සමරසිංහ මහතා පැවසුවේ මෙම නිවාස සංකීර්ණයේ කාමර එකක නිවාසයක් රුපියල් මිලියන 19 ක් පමණත්, කාමර 02,03,04, යන පරාසවල පිහිටි නිවාසයක් රුපියල් මිලියන 45 ක පමණ මිලක් වන බවයි.
මීට අමතරව, රුපියල් මිලියන 65 ත් 90 ත් අතර මිලක් ගන්නා නිවාසද මෙහි තිබෙන බව හෙතෙම සඳහන් කළේය.
අක්කර 17 ක ඉඩමක ඉදිවන හැව්ලොක් සිටි නිවාස සංකීර්ණයේ ප්‍රධාන තේමාව වන්නේ නගරයක් තුළ නගරයක් යන්න වන අතර කාර්යාල හා සාප්පු සංකීර්ණ ඇතුළත් කුළුණු දෙකක් ඉදිවේ.
2015 දී වැඩ අවසන් කිරීමට නියමිත මෙම ව්‍යාපෘතියේ වැඩ අවසන් කළ විට මෙහි නිවාස ඒකක 1080 ක් ඉදිවන බවත් සම්පූර්ණ ව්‍යාපෘතිය වෙනුවෙන් ඩොලර් මිලියන 350 ක් පමණ ආයෝජනය කිරීමට නියමිත බවත් සමරසිංහ මහතා සඳහන් කළේය.
සාප්පු සංකීර්ණය සහ කාර්යාල ඉඩකඩ සලසන කුළුණු ඉදිකිරීම 2012 දී ආරම්භ කිරීමට නියමිත අතර ඒවා ඉදිකිරීම සඳහා වසර තුනක් ගතවන බවත් අවසන් කුළුණු හතර ඇතුළත් වන අදියර තුන හා හතර 2015 දෙසැම්බර් මාසයේදී විවෘත කිරීමට සැලසුම් කර තිබෙන බවත් හෙතෙම වැඩිදුරටත් පැවසීය.
මෙම නිවාස සංකීර්ණයේ ක්ලබ් හවුස් සංකීර්ණය ඉදිකිරීමේ කටයුතු අද පෙරවරුවේ නිළ වශයෙන් ආරම්භ විය.
හැව්ලොක් සිටි යෝජනා ක්‍රමය ඕවර්සීස් රියැල්ටි සිලෝන් සමාගම ලංකාවේ ආරම්භ කළ දෙවැනි ව්‍යාපෘතිය වන අතර මෙම සමාගමේ ප්‍රධානියා වන්නේ එස්.පී. ටාවෝ මහතායි.
මෙම නිවාස සංකීර්ණයේ මතු මහළේ අක්කර හයකින් යුක්ත උද්‍යානයක් ඉදිකිරීමටද සැලසුම් කර තිබේ.
0 comments:
Post a Comment